نهاره...اللي كنا بش نضيعو!

عيني مازالو منفخين بالدموع...همي يجري بين الضلوع....و غدوه مالو رجوع..الدنيا اكحالت,اظلامت, و خزرتلي و ضحكت...و مشات!

كذبت عليا,عطشتني و جوعتني...بمحبتك!

اليوم فقت...اليوم رجعت لروحي و يا ليتني ما رجعت:لقيتها فارغه...حايره...ساكته و موجوعه...لقيتها حزينه رزينه...ما تتهزش بمقص النار ...لقيتها ماتعرفنيش و ماتحبش تراني و لا تسمع سيرتي...

فجعتني,قتلتني, و ذلتني...

قاتلي لا نعرفك و لاك روحي...اخطاني,ابعدني و ما تمسنيش...جايتني توه بعد شنيه...ثلاث سنين بعيده  و توه تفكرتها ?

....وينك?علاش?وقتاش?فاش قام?تحب حاجه?..

اليوم بكيت..بكيت...بكيت ..من داخل و من بره...قدام العباد و بالسرقه علاهم...و ماعادش يهمني!...

قعدت قدام المرايه..مشيت و جيت....تربعت و قمت...حكيت معاها......حبيت نفهمها...و الله لا نجمتها...حرت و حار دليلي...

رامي نحبك...نبكي و ننوح..على خاطر نحبك...نموت عليك,ريحتك,غزرتك...و محبتك ليا....يا الشايب

.... دِلني..يا الشايب وصَلني...يا الشايب فيقني...يا الشايب اقتلني...يا الشايب ايجاني.. يا الشايب احييني...... 

العزوزه

ها الشايب...!

الظلام موحِش و البرد موجع...الدنيا تلوِج عالدنيا و انا نتفكر كي كنت نعرفك و نعرف الدنيا...كْلاتنا,قتلتنا,قربتنا و بعدتنا و خلاتنا بجنب بعضنا بش تعذبنا اكثر...امّاله!هكاكه احسن...

الخوف ماليني...و الوجاعه تحرقلي في كنيني... :عزوزتك ويني?هاي شارده تتفكر في اياماتها...

وقت اللي كانت صبيه?بالطبيعه لا...وقت اللي كان الحب في حياتها عامل مسد...وقت اللي كانت في عينيك ما كيفها حد...وقتلي كنت تستنا وقتاه تجيبليك الولد...

الشايب...بحبني,نحبو و نفنى عليه...بدلتو الدنيا عليا,بدلتني عليه...اما نحبو و يحبني...

الشايب هذا..ما شي في  بالو ناسيتو,ماشي في بالو مهملتو...و نسا اللي انا هوني على خاطرو..و نسا الي نحنا تعرفنا و عرسنا في خمسه ايام...نسا عينيه كيفاش غزرلي بيهم...نساني...و نسا ريحتي و يدي في راحه يدو..

نسا اللي علا خاطرو كل شي يهون...نسا اللي روحي فنيتها علا خاطرو واللي صاير اليوم ما هوش دايم و اللي غدوه خير...نسا اللي ما يدوم حال و اللي كي هزيت معاه القفه مالاول موش بش نجي تو و نرخ بيه...

نسا و نسيت برشه حاجات...و ما لقيناش الخير في رواحنا بش نصلحو بعضنا...

زعمه...??

العزوزة

وينك...وينك...

وينك يا الشّايب...تصورت روحي مانيش راجعه بش نحكيلك علّي يدور في خاطري..و اللي على خاطرو يدق قلبي:قلت كبرنا, و يا عزوزه احشم..اما,ما نجمتش! نطلع نهبط,نلقا حبك يا مولا بيتي هو الكل,ندور الدنيا شليله و مليله,و ما نلقاك كان انتي تفهمني..

هذا كي تحب تفهمني:تسكرت في و جهي البيبان: موش بيبان الدنيا,لا تعرفني نقد روحي معاها,اما تسكرت عليا بيبان روحي...قلبي ما عادش يحكيلي,روحي هجرتني و قعدت رهينه في تركينه,و حدي ,لا نحس,لا نفرح,لا نبكي,...نمشي و نجي,نشوف الجيران و نسأل علا الاحوال..الكل يجاوبني,الكلهم يحبوني,يوشحلو و يسألو..اما أنا ماعادش نعرفهم,و لاّ خلّيني نقلّك ,ما نحبّش نعرفهم!

 احوالي غريبه...الفاميليا...الخو و الاخت,الامّيمه و الحاج...ماعادش نعرفهم...الدنيا تبدّلت, و أنا كبرت..امّا رد بالك مازّلت مزيانه,لهلوبه,عينيّ يهبّلو و سِنيّا لولي...و خدودي تفّاح...حبّيت نفّكرك و برّه!

تعرفني عمري ما حكيت بلغه الزّهر,و الفرتونه...عندي انا ,الخدمه تجيب...تعبت و تعذّبت و ما قلتش اي..و علاه بش نقولها و هو ما يحّس الجمره كان اللّي يعفس عليها?

المهم,توحشتك و توحشت ايماتنا و قت اللي كانت كلمه من فمك تهزني لبعيد,و تبسيمه تخليني نسيب الدنيا و نجيك...توه ياالحاج..وينو? كل شي تبدل...قلبي مر يقطر,عيني تغزر و ما تراش,الهوا يدخل و يخرج و مانيش نتنفس..ضاقت عليا الدنيا ونتي ماكش حاث بيا...يمكن انا اللي ما خليتكش...اما اللي صار صار...و انا خوفي كان منك..اي منك انتي...

العزوزه هايمه...عزوزتك هايمه...داخله في حيط كيما يقولو توا...ما نيش نلاجي بروحي نلوج علا مخرج..اما نفضفض للقلب الي قلي في نها مالنهارات..:ادخل راك متاعي,مرتي و نحبك و نحن عليك,نصونك و نحطك في عيني,نفهمك و لو كان فهمانك صعيب عليا..اما وينو الكلام...! هاني فهمت اللي المحبه صبر..المحبه...دموع و صياح للصباح..صياح جواجيا و النار اللي شاعله فيا...صياح همومي...صياح المرا اللي ساكنه فيا..

جيتك نحكيلك,جيتك نشكيلك...جيتك و الهم قاتلني..و الغبن قاتلني...وينك كي كنت تصول و تجول...وينك...وينك...

العزوزة